அருங்குரற் தும்பி!

புலரிடைக் காற்று கிளையிடை ஊத
பூவிடைப் படிந்த பனிநீர் சிதற
இணரிடை விதிர்ப்புறும் அருங்குரற் தும்பி
கள்ளுடைப் போதின் மடலவிழ்த் தாட
உள்ளுதல் உந்திட உறுதலு முகுமே
உள்ளுதல் அங்கே தோழியென்
உள்ளம் கொண்டவர் ஊடலின் அணித்தே!

(பாவகை: நேரிசை ஆசிரியப்பா)

காற்று வீசியதால் பூங்கொத்திடைப் படிந்திருந்த நீர் சிதற, அதிர்ச்சியுற்றுப் பறந்த வண்டானது, மீண்டும் தேனினையுடைய மலர்மொட்டுகளின் இதழ்களை அவிழ்த்து விளையாட அதன் நெஞ்சம் தூண்டும். அதைப் போல்தான் தோழி, நான் கொண்ட ஊடலின் பின்னே என் நெஞ்சமும்!